Category Archives: यायोक्खा हङकङ

बधाई तथा शुभकामना

१३ मे २०१८ हङकङ ।

किरात राई यायोक्खा हङकङकी सहसचिव पविता पुमा राई नेपाली महिला संघ हङकङद्वारा १३ मे २०१८ मा आयोजित “मिसेस हङकङ नेपाल” सुन्दरी प्रतियोगीताको प्रथम विजेता बन्नु भएकोमा उहाँको भावी सफलता र उत्तरोत्तर प्रगतिको कामना गर्दै हार्दिक बधाई एवं शुभकामना दिन चाहन्छौं । सुम्निमा-पारुहाङले सदैव उहाँ साथ रहुन् ।

किरात राई यायोक्खा हङकङ ।

ताइमोशानमा साकेला उभौली

६ में, २०१८ हङकङ

यहाँस्थित ताईमोशान कन्ट्री पार्क (यलम्बर पार्क)मा नेपाली राष्ट्रिय चाड साकेला उभौली भव्यताकासाथ सम्पन्न भएको छ । आयोजक किरात राई यायोख्खाका अध्यक्ष हरिचन्द्र राईको अध्यक्षतामा सम्पन्न सो साकेलाको औपचारिक  कार्यक्रममा आदिवासी जनजाती महासंघका अध्यक्ष किसन राईको प्रमुख आतिथ्यता रहेको थियो । यसै गरी नेपाली महासंघकी अध्यक्ष रीता गुरुङ र भूतपूर्व व्रिटिश सैनिक संघको बिशेष अतिथ्यतापूर्ण उपस्थिति थियो । नेपाल च्याम्वर्श अफ कमर्श र गैर आवासीय नेपालीलाई पनि बिशेष आतिथ्यताको निम्तो दिइएको भएपनि अनुपस्थित थिए ।

कार्यक्रममा आदिवासी जनजाती महासंघमा आवद्ध संस्थाका प्रमुख/प्रतिनिधि, किरायाका कुविमी, किरात राई प्रमुख रहेका सामाजिक संस्थाका प्रमुख/प्रतिनिधि, किरायाका संरक्षकहरु, प्रमुख सल्लाहकार (निवर्तमान अध्यक्ष), सल्लाहकारहरुलगायत समाजका लब्ध प्रतिष्ठित व्यक्तित्वहरुको अतिथ्यता रहेको थियो । यसै कार्यक्रममा संस्थाको बार्षिक मुखपत्र “यलम्बर” को १९औं अंक लोकार्पण गरिएको थियो।

आयोजक संस्थाका सचिव गजेन्द्र राईको सञ्चालन र महासचिव बज्र कुमार राईको स्वागत मन्तव्यबाट शुरु भएको सो कार्यक्रममा प्रमुख सल्लाहकार रजिन राई, बिशेष अतिथि रीता गुरुङ (सम्पूर्ण अतिथिगणको तर्फबाट) र प्रमुख अतिथि किसन राईले मन्तव्य राखेका थिए।

कार्यक्रमका अध्यक्ष हरिचन्द्र राईले औपचारिक कार्यक्रमको समापन गरे पश्चात सहायक कुविमीद्वय नारायण प्रसाद राई र मैत कुमार राईले साकेला थानमा पूजा गरी यो साल कुनै प्राकृतिक अनिष्ट नहुने बताएका थिए । यसपछि शीलीमोपा प्रतिक चाम्लिङ राई र शीलीमोमा रेणुका साम्पाङ राईले सयौं संख्यामा साकेला शीली नाँच्न आतुर महानुभावहरु बीच साकेला शीली नाँचको शुभारम्भ गरेका थिए। साकेला शीली नाँचपूर्व कुविमीद्वय, शीलीमोपालाई फेटा गुथाएर र शीलीमोमालाई मुजेत्रो ओढाएर सम्मान गरिएको थियो।

नेपालका आदिवासी किरात राईहरुले परापूर्वकालदेखि मान्दै आएको यो राष्ट्रिय चाडमा गैर राई तथा बिदेशीहरुको पनि सहभागीता देखिन्थ्यो । मौलिक खानपान, वार्विक्यूसाथै पेयपदार्थहरुको उचित व्यवस्था गरिएको उक्त साकेला उभौलीमा आफ्नो (किरात राई) मौलिक भेषभूषा तथा गरगहनामा सजिएर आएका सबै उमेर समुहका किरात राई दाजुभाई-दिदीबहिनीहरुको उत्साहपूर्ण बाहुल्यता रहेको थियो ।

कार्यक्रमको निर्धारित समय (६ बजेपछि) अध्यक्ष हरिचन्द्र राई र सम्बन्धित विभागका प्रमुख रामचन्द्र राईले कुविमी, शीलीमोपा र शीलीमोमालाई शीर उभ्याउने संस्कार अनुसार सो कार्य गरेका थिए । अध्यक्ष राईले कार्यक्रम सफल हुनुमा किराया सम्बद्ध भाषीक संस्थाहरुको महत्वपूर्ण कार्य भूमिका रहेको भन्दै  सबैप्रति धन्यवादपूर्ण कृतज्ञता व्यक्त गरेका थिए ।

– बज्र कुमार राई

सुप्तुलुङमा फर्किए निरज

३० अप्रिल २०१८, हङकङ ।

साहित्य तथा संगीतकर्मी नीरज वान्तवा राई किरात राईहरुको मौलिक धर्म,संस्कार-संस्कृतिलाई स्वीकार गर्दै सुप्तुलुङ (चुला) मा फर्किएका छन् । किरायाका भाषिक संस्था वान्तवा यायोक्ला खीमका अध्यक्ष तिलक वालाहाङ राई र नाक्छोङ मैत्र कुमार राईले मुन्दुमी प्रक्रियाद्वारा उनलाई चुलामा प्रवेश गराएका थिए । चुला प्रवेश पश्चात स-सम्मान फेटा गुथाएर  निरजको शीर उभ्याउने कार्य पनि गरिएको थियो । किरात राईहरुको संस्कारमा फेटा गुथाउनुलाई बिशेष सम्मानको रुपमा लिने गरिन्छ । आफ्ना पारिवारिक अग्रजहरुले अन्य धर्म-संस्कार मान्दै आएको र त्यसमा किरात राई हुनुको कुनै मौलिक पहिचान नरहने कुरा आफूले गहन रुपमा महशुश गरी आफ्नै मौलिक धर्म, संस्कार, संस्कृतिमा फर्किएको बताउँदै नीरजले सुप्तुलुङ (चुला) ढोगे । भावी दिनहरुमा आफ्ना सन्ततिहरुलाई किरात राईहरुको भाषा, धर्म, संस्कार, संस्कृति तथा समग्र मुन्दुमी दर्शनबारे ज्ञात गराउँदै आफ्नो मौलिकताको पक्षमा उभिने कुरा निरजले आफ्नो मन्तव्यमा थपे । किरायाले विभिन्न कारणले बाटो बिराएर, आफ्नो मौलिकता भूलेर अर्काको धर्म, संस्कार, संस्कृतिमा गएका आफ्ना किरात राई दाजुभाई/दिदीबहिनीहरु आफ्नै घरमा, आफ्नै धर्म,संस्कार,संस्कृतिमा फर्कन आव्हान गर्दै आएको छ । स्मरण रहोस् किराया हङकङले विगत ३ बर्षअघि जमीनसहितको आफ्नै भवन (जसलाई सुप्तुलुङखीम भनिएको छ) खरीद गरी किरात राईहरुको सम्पूर्ण मौलिक संस्कार-संस्कृति सम्पन्न गर्ने थलो निर्माण गरेको छ । यस थलोमा निरजलाई जस्तै सबै किरात राईहरुलाई हार्दिक स्वागत छ ।

उभौली चुलापूजा २०१८

३० अप्रिल २०१८, हङकङ ।

किरात राई यायोक्खाको सुप्तुलुङखीम (चुलाघर) मा चुलापूजा सम्पन्न भएको छ । आफ्ना पितृ-पूर्खाहरुलाई सम्झदैं, बल-आशीर्वाद माग्दै सुख-समृद्धिको कामना गर्दै हर्षोल्लासपूर्वक साकेलाको शिली नाँचको शुभारम्भ गरिने किरात राईहरुको मौलिक परंमपरा अनुरुप सहायक कुविमी नारायण प्रसाद राई र मैत्र कुमार राईद्वारा चुलापूजा गरिएको हो ।

आगामी ६ में २०१८ का दिन ताइमोशन कन्ट्री पार्कमा बिगत बर्षहरुमा झैं साकेला शिली नाँच आयोजना गरिएको छ। उपस्थितिका निम्ति सबैमा सादर निमन्त्रणा गरिएको छ।

#सबैमा साकेला उभौलीको हार्दिक मंगलमय शुभकामना।

बुझबुझारथ, बिदाई तथा पदास्थापन

१५ अप्रिल २०१८ हङकङ,

किरात राई यायोख्खाको सुप्तुलुङखीममा संस्थाको ९औं अधिवेशनबाट चयन भएको कार्यसमिति र पूर्व कार्यसमिति बीच बुझबुझारथ, बिदाई तथा पदास्थापन कार्यक्रम सम्पन्न गरिएको छ ।

बुझबुझारथमा पूर्वाध्यक्ष रजिन राईले बर्तमान अध्यक्ष हरिचन्द्र राईलाई संस्थाको महत्वपूर्ण कागजपत्र र तालाचावी हस्तान्तरण गर्दै किरात राईहरुको मौलिक धर्म, संस्कार-संस्कृतिको संरक्षण-संबर्द्धन र पुस्तान्तरण गर्ने कार्यमा नवनिर्वाचित कार्यसमितिले सांगठानिक रुपमा दत्तचित्तले कार्य गर्ने विश्वास व्यक्त गर्नु भएको थियो। यसै क्रममा पूर्व सचिव बज्र कुमार राई र पूर्व कोषाध्यक्ष गजेन्द्र राईले वर्तमान सचिव गजेन्द्र राई र कोषाध्यक्ष गंगाराम राईलाई पदीय जिम्मेवारी निर्वाह गरेको कागजपत्र हस्तान्तरण गर्नु भएको थियो।

स्मारिका प्रकाशन

लेख/रचना पठाई दिनहुन अनुरोध ।

किरात राईहरुको ईतिहास, भाषा, लिपि, धर्म, संस्कार, संस्कृती, कला, साहित्य बिषयमा जानकारी मुलक लेख/रचनाहरु प्रकाशन गरि किरात राईहरुलाई सुसुचित गराउन तथा चेतना जगाउन किरात राई यायोक्खा हङकङले बार्षीक रुपमा यलम्बर स्मारिका नामक मुखपत्र प्रकाशन गरि नि:शुल्क बितरण गर्दै आईरहेको जानकारी गराउदछौं ।

सदा बर्ष झैं यस बर्ष पनि साकेला उभौलीको दिन लोकार्पण गर्न लागी रहेकाछौ । यहाँहरुको किरातजन्य लेख/रचनाहरु छ भने प्रकाशनको लागि पठाई दिनहुन लेखक तथा सर्जकहरुलाई हार्दिक अनुरोध गर्दछौ । सर्जकहरुलाई समय सापेक्ष शिर उभ्याउनि गरिने जानकारी गराउदछौं ।

७. लेख/रचना प्रकाशन नियम :

  1. लेख/रचना किरात राईहरुको ईतिहास, भाषा, लिपी, धर्म, संस्कार, संस्कृती सम्बन्धि हुनुपर्ने छ ।
  2. लेख/रचना कम्तिमा १ पेज र बढिमा ३ पेज सम्मको हुनु पर्नेछ । अति लामो लामो लेख/रचनाहरु प्रकाशन गरिने छैन ।
  3. प्रकाशित लेख/रचनाको प्रति हङकङ डलर ३०० का दरले शिर उठाउनी स्वरुप लेखकहरुलाई कुनै सर्वजानिक कार्यक्रमको अवसरमा सम्मान गरिने छ ।
  4. अति छोटो लेख/रचनाहरु जस्तै : मुक्तक, कबिता, लघुकथाहरु आदिलाई शिर उठाउनी प्रदान गरिनेछैन ।
  5. लेख/रचना तोकिएको समयभित्र आई सकेको हुनु पर्नेछ । बिलम्व लेख/रचना प्रकाशन गरिने छैन ।
  6. लेख/रचनाको कपिराईट लागु गरिनेछ । चोरेको लेख/रचनाको जिम्मेवार स्वंय लेखक हुनुपर्ने छ ।
  7. लेख/रचना प्रकाशन गर्ने वा नगर्ने अधिकार संयोजन समितिमा निहित रहने छ ।
  8. लेख/रचनामा कुनै विवाद आएमा संयोजन समितिको निर्णय अन्तिम हुनेछ ।

पुस्तक बिवरण :

नाम : यलम्बर स्मारिका; अंक : १९
छपाई थान प्रति : २००
लोकार्पन हुने मिति (उभौलीको दिन) : ६ मे २०१८
प्रकाशन मिति (७ दिन अगावै) : २९ अप्रिल २०१८
लेख/रचना, पठाउने अन्तिम मिति
(१४ दिन अगावै) : २२ अप्रिल २०१८
लेख/रचना पठाउनुपर्ने ठेगाना :
yalambar16@gmail.com