Category Archives: यायोक्खा हङकङ

सामाको अध्यक्षमा रामली नै

१ जूलाई २०१८ हङकङ,

थुलुङ राई सामाको तेस्रो अधिवेशनबाट तेस्रो कार्यकालकालागि पनि रामली थुलुङ राई नै निर्विरोध चयन भएका छन् । विधानत: १५ सदस्यीय कार्यसमिति व्यवस्था रहेको अन्य पद उपाध्यक्ष, सचिव, सहसचिव, कोषाध्यक्ष र सहकोषाध्यक्षमा क्रमशः विजय थुलुङ राई, प्रेम थुलुङ राई, दिनेश थुलुङ राई, राम नारायण थुलुङ राई र सोजित थुलुङ राई रहेका छन् भने सदस्यहरुमा बज्र कुमार थुलुङ राई, राम कुमार थुलुङ राई, टिका थुलुङ राई, नवीन थुलुङ राई, नरेन थुलुङ राई, रश्मिला थुलुङ राई, उर्मिला थुलुङ राई, सुमन थुलुङ राई र गौरव थुलुङ राई चयन भएका छन् ।

प्रमुख अतिथि किरात राई यायोख्खाका अध्यक्ष हरिचन्द्र राईको बाहुलीबाट दियोमा बत्ती बाली उदघाटन गरिएको उक्त अधिवेशनमा किराया सम्बद्ध भाषिक संस्था चाम्लिङ खाम्बातिमका अध्यक्ष पवित्रा राई, साम्पाङ जुम्लेखाका अध्यक्ष तेज कुमार राई, पुमा तुप्खा बाङखालाका अध्यक्ष पेङगुइन किरात, वान्तवा यायोक्लाखीमका उपाध्यक्ष दुर्गाकान्त राई, सोदेल कोयीकिमका अध्यक्ष हित बहादुर कोयी राई लगायतका व्यक्तित्वहरुको आतिथ्यता रहेको थियो । उक्त अधिवेशन आफ्नो मौलिक धर्म, संस्कार-संस्कृति मान्ने किरात राईहरुको किलुङचुनस्थित सुप्तुलुङखीमको यलम्बर हलमा सम्पन्न भएको थियो ।

-बज्र कुमार राई

सुप्तुलुङमा बेलायतका श्रीमान/श्रीमती

१ जूलाई २०१८ हङकङ,

याङसोला-५, छोरम्बु,खोटाङ थातथलो भई हाल वेलायतनिवासी ८८ बर्षीय वृद्धवृद्धा श्रीमान/श्रीमती बिर्ख बहादुर राई र भाईसोनया राईले किरात राई मौलिक धर्म, संस्कार-संस्कृति मान्ने किरात राईहरुको यहाँ स्थित सुप्तुलुङखीमको सुप्तुलुङ (तीन चुला) ढोग-दर्शन गरेका छन् । यहाँ निवासी उनका छोरा देवेन्द्र राईको अगुवाईमा यो कार्य गरिएको हो ।

कार्यक्रममा किराया अध्यक्ष हरिचन्द्र राई, उपाध्यक्ष माया (चन्द्रका) राई, महासचिव बज्र कुमार राई लगायतको समुपस्थित रहेको थियो । सुप्तुलुङ (तीन चुला) ढोग-दर्शन पश्चात

अध्यक्ष राईले दर्शनार्थी श्रीमान राईको शीरमा फेटा गुथाएर सम्मान गरेका थिए भने श्रीमती राईको शीरमा मजेत्रो ओढाएर उपाध्यक्ष चन्द्रका राईले सम्मान गरेकी थिईन । यसकासाथै पाहुनाद्वयलाई संस्थाको मुखपत्र यलम्बर र साकेला सिलीको सीडी प्रदान गरिएको थियो ।

सुप्तुलुङ दर्शन र सम्मानपछि बोल्दै दर्शनार्थी विर्ख बहादुरले आफ्नो जातीय मौलिक धर्म, संस्कार-संस्कृति जोगाउने कार्य गरेकोमा संस्था (किराया) प्रति आभारसहित धन्यवाद व्यक्त गर्दै तीन चुलाको महत्त्व र दर्शनलाई पुस्तान्तरण गर्दै लानु पर्ने बताए ।

-बज्र कुमार राई

सुप्तुलुङखीममा विवाह सम्पन्न

१६ जून, हङकङ ।

कि लुङ चुनस्थित किरात राईहरुको सुप्तुलुङखीम (चुलाघर)मा किरात राई यायोख्खाका सहायक कुविमी श्रीमान नारायण प्रसाद राई र श्रीमती शिव कुमारी राईको जेठी छोरी रेणुका राईको विवाह श्रीमान सकल बहादुर राई र श्रीमती मन कुमारी राईको कान्छा छोरा मणीचन्द्र राईसँग सम्पन्न भयो ।

किरात राई सम्पाङ जुम्लेखाको समायोजनमा भएको सो विवाह किरात राई मुन्दुमी संस्कार अनुसार गरिएको थियो । किरात राईहरुको मौलिक संस्कार-संस्कृतिलाई जीवन्त राखी पुस्तान्तरण गर्दै जाने उद्धेश्य लिएर गरिएको उक्त विवाहमा गाउँघरको मौलिक भोजभतेर तयार गरी दुना, टपरा, कठुआ आदिमा राखी जन्ती, नरनाता तथा इष्टमित्रहरुलाई दिइएको थियो ।

मुन्दुमी रीतिथीति अनुसार सुप्तुलुङखीममा विवाह सम्पन्न भए पनि दोस्रो दिन इण्डिया क्लवमा आमन्त्रित सबैकालागि विशाल प्रीतिभोजको आयोजना गरिएको थियो । आमन्त्रित सबैले यसै स्थानमा उपस्थित भई बेहुला-बेहुलीलाई टिका लगाई दिएर आशिर्वाद दिदैं बधाई तथा शुभकामना व्यक्त गरेका थिए ।

-बज्र कुमार राई

महासचिवले सुप्तुलुङ दर्शन गरे

१० जून २०१८ हङकङ ।

खोटाङ हलेसीमा निर्माणधीन मौलिक धर्म,संस्कार-संस्कृति मान्ने किरात राईहरुको प्राग ऐतिहासिक थलो  तुवाचुङ-जायाजुम संरक्षण समितिका महासचिव तथा नेपाली कांग्रेसका युवा नेता दिनेश राईले यहाँस्थित किरात राईहरुको सुप्तुलुङखीम (चुलाघर)मा राखिएको सुप्तुलुङ (चुला) दर्शन-ढोग गरे ।

किराया प्रमुख संरक्षक तथा किराया प्रज्ञा प्रतिष्ठानका कुलपति शशीमदन राईले सुप्तुलुङखीम खरीद गर्नुको औचित्य र सोहि अनुरुप भई रहेका कार्यहरु बारेमा सबैको प्रतिनिधित्व गर्दै संक्षिप्तमा मन्तव्य राखे। यसैगरी कार्यसमितिका सल्लाहकार धिराज कुमार राई र पदेन उपाध्यक्ष तिलक वालाहाङ राईले साकेला शीली भाग -१ र २ सीडीसाथै संस्थाको मुखपत्र यलम्बर उपहारस्वरुप प्रदान गरे।

किराया कार्यसमितिका अध्यक्ष हरिचन्द्र राईले पाहुना दिनेश राईको शीरमा फेटा गुथाई दिएर सम्मान व्यक्त गरे । सम्मान पश्चात पाहुना दिनेशले आफ्नो मन्तव्य राख्ने क्रममा आफ्नो जातीय उत्थानकालागि आफू मौलिक पहिचानको पक्षमा रही सदैव  क्रियाशील रहने बताए ।

त्यस्तै चुला दर्शन गर्न अगावै सुप्तुलुङखिमको अगाडि रहेको रमणिय डाँडामा हाईकिङ कार्यक्रम आयोजना गरिएको थियो । यसै अवसरमा यो डाँडाको नाम तुवाचुङ डाँडा भनेर राईले नामाकरण समेत गरे ।

सचिव गजेन्द्र राईले सञ्चालन गरेको उक्त कार्यक्रममा कार्यसमितिका विभिन्न पदीय जिम्मेवारीमा रहेका पदाधिकारी तथा विशिष्ट किरात राई व्यक्तित्वहरुको उपस्थिति रहेको थियो । कार्यक्रमको अन्त्यमा सगुनस्वरुप आराखा (रक्सी) खुवाईएको थियो ।

-बज्र कुमार राई

बधाई तथा शुभकामना

१३ मे २०१८ हङकङ ।

किरात राई यायोक्खा हङकङकी सहसचिव पविता पुमा राई नेपाली महिला संघ हङकङद्वारा १३ मे २०१८ मा आयोजित “मिसेस हङकङ नेपाल” सुन्दरी प्रतियोगीताको प्रथम विजेता बन्नु भएकोमा उहाँको भावी सफलता र उत्तरोत्तर प्रगतिको कामना गर्दै हार्दिक बधाई एवं शुभकामना दिन चाहन्छौं । सुम्निमा-पारुहाङले सदैव उहाँ साथ रहुन् ।

किरात राई यायोक्खा हङकङ ।

ताइमोशानमा साकेला उभौली

६ में, २०१८ हङकङ

यहाँस्थित ताईमोशान कन्ट्री पार्क (यलम्बर पार्क)मा नेपाली राष्ट्रिय चाड साकेला उभौली भव्यताकासाथ सम्पन्न भएको छ । आयोजक किरात राई यायोख्खाका अध्यक्ष हरिचन्द्र राईको अध्यक्षतामा सम्पन्न सो साकेलाको औपचारिक  कार्यक्रममा आदिवासी जनजाती महासंघका अध्यक्ष किसन राईको प्रमुख आतिथ्यता रहेको थियो । यसै गरी नेपाली महासंघकी अध्यक्ष रीता गुरुङ र भूतपूर्व व्रिटिश सैनिक संघको बिशेष अतिथ्यतापूर्ण उपस्थिति थियो । नेपाल च्याम्वर्श अफ कमर्श र गैर आवासीय नेपालीलाई पनि बिशेष आतिथ्यताको निम्तो दिइएको भएपनि अनुपस्थित थिए ।

कार्यक्रममा आदिवासी जनजाती महासंघमा आवद्ध संस्थाका प्रमुख/प्रतिनिधि, किरायाका कुविमी, किरात राई प्रमुख रहेका सामाजिक संस्थाका प्रमुख/प्रतिनिधि, किरायाका संरक्षकहरु, प्रमुख सल्लाहकार (निवर्तमान अध्यक्ष), सल्लाहकारहरुलगायत समाजका लब्ध प्रतिष्ठित व्यक्तित्वहरुको अतिथ्यता रहेको थियो । यसै कार्यक्रममा संस्थाको बार्षिक मुखपत्र “यलम्बर” को १९औं अंक लोकार्पण गरिएको थियो।

आयोजक संस्थाका सचिव गजेन्द्र राईको सञ्चालन र महासचिव बज्र कुमार राईको स्वागत मन्तव्यबाट शुरु भएको सो कार्यक्रममा प्रमुख सल्लाहकार रजिन राई, बिशेष अतिथि रीता गुरुङ (सम्पूर्ण अतिथिगणको तर्फबाट) र प्रमुख अतिथि किसन राईले मन्तव्य राखेका थिए।

कार्यक्रमका अध्यक्ष हरिचन्द्र राईले औपचारिक कार्यक्रमको समापन गरे पश्चात सहायक कुविमीद्वय नारायण प्रसाद राई र मैत कुमार राईले साकेला थानमा पूजा गरी यो साल कुनै प्राकृतिक अनिष्ट नहुने बताएका थिए । यसपछि शीलीमोपा प्रतिक चाम्लिङ राई र शीलीमोमा रेणुका साम्पाङ राईले सयौं संख्यामा साकेला शीली नाँच्न आतुर महानुभावहरु बीच साकेला शीली नाँचको शुभारम्भ गरेका थिए। साकेला शीली नाँचपूर्व कुविमीद्वय, शीलीमोपालाई फेटा गुथाएर र शीलीमोमालाई मुजेत्रो ओढाएर सम्मान गरिएको थियो।

नेपालका आदिवासी किरात राईहरुले परापूर्वकालदेखि मान्दै आएको यो राष्ट्रिय चाडमा गैर राई तथा बिदेशीहरुको पनि सहभागीता देखिन्थ्यो । मौलिक खानपान, वार्विक्यूसाथै पेयपदार्थहरुको उचित व्यवस्था गरिएको उक्त साकेला उभौलीमा आफ्नो (किरात राई) मौलिक भेषभूषा तथा गरगहनामा सजिएर आएका सबै उमेर समुहका किरात राई दाजुभाई-दिदीबहिनीहरुको उत्साहपूर्ण बाहुल्यता रहेको थियो ।

कार्यक्रमको निर्धारित समय (६ बजेपछि) अध्यक्ष हरिचन्द्र राई र सम्बन्धित विभागका प्रमुख रामचन्द्र राईले कुविमी, शीलीमोपा र शीलीमोमालाई शीर उभ्याउने संस्कार अनुसार सो कार्य गरेका थिए । अध्यक्ष राईले कार्यक्रम सफल हुनुमा किराया सम्बद्ध भाषीक संस्थाहरुको महत्वपूर्ण कार्य भूमिका रहेको भन्दै  सबैप्रति धन्यवादपूर्ण कृतज्ञता व्यक्त गरेका थिए ।

– बज्र कुमार राई